Sestaoko Udalak urrats berri bat egin du, erabakigarria udalerriaren orainaldirako eta etorkizunerako bere proiektu estrategiko garrantzitsuenetako batean. Hala, hiru hirigintza-lizentzia eman dizkio VGP enpresa paneuroparrari La Naval ontziola zaharraren eraikin historikoak birgaitzeko, enpresa hori baita kalitate handiko higiezin logistiko eta erdi-industrialen jabea, kudeatzailea eta sustatzailea.

Zehazki, pasa den astean sinatutako ebazpenek honako eraikin hauek birgaitzea baimentzen dituzte: 44-10 eraikina, Zentral Elektrikoa izenez ezagututakoa; 44-11 eraikina, Bulego Orokorrei dagokiena; eta 44-13 eraikina, Jangelen eta Botikinaren Pabiloia. Guztiak LNP1 partzelan kokatzen dira, La Naval eremuaren Hiri Antolamenduko Plan Bereziaren 1. Birgaitze Jarduketa Isolatuaren barruan. Hiru jarduketen aurrekontua 5.591.432 eurokoa da, BEZik gabe.

Oso aurrerapauso garrantzitsua da Sestaorako, bai hirigintzaren eta ekonomiaren ikuspegitik, bai ondarearen eta nortasunaren ikuspuntutik. La Naval udalerriko industria- eta lan-oroimenean dago, baina eraldaketa horizontean ere bai. Horregatik, eremu horretan egiten den urrats irmo bakoitzarekin iraganeko eremu handi bat etorkizuneko aukera paregabe bihurtuz doa.

Eraikin babestuak

Gainera, hiru lizentziek bereziki babestuta dauden higiezinei eragiten diete. La Naval eremua Babes Bereziko Kultur Ondasun izendatu zen 2022an, Monumentu Multzoaren kategoriarekin, eta testuinguru horretan, nahitaez kontserbatu behar dira Zentral Elektrikoa, Bulego Orokorrak eta Jangelen eta Botikinaren Pabiloia. Era berean, esku-hartzeak Bizkaiko Foru Aldundiko Kultura Zuzendaritza Nagusiaren aurretiazko baimena du. Hark proposamena zuzentzat eta bateragarritzat jo zuen multzoaren ondare-balioak kontuan hartuta.

Bulego Orokorren eta Jangelen eta Botikinaren Pabiloiaren kasuan, dokumentazioaren arabera, bulegoen erabilera tertziarioa aurrez ikusten da. Bestalde, Zentral Elektrikoan birgaitze-lizentzia oraindik eraikinaren azken erabilera zehaztu gabe eman da, beraz, gerorako izapideetan zehaztu beharko da.

Bulego Orokorren oraingo eraikina 1956. urtekoa da; dena den, lehenengo bulego orokorrak berritu ostekoa da. XX. mendearen bigarren hamarkadan eraiki ziren, baina oinarrizko jatorrizko tipologiari eutsi zitzaion, berrinterpretatuz estilo-hizkuntza berriaren bidez. Eraikinak 1.200 metro karratu okupatzen ditu, eta azalera eraikia 3.600 metro karratukoa da.

Jangelen eta Botikinaren Pabiloia ontziolaren lehen modernizazio-fasean eraiki zen 40ko hamarkadaren lehenengo urteetan, langileentzako jangelak eta botikina kokatzeko. Kasu honetan, eraikinak berez 1.350 metro karratu okupatzen ditu, eta azalera eraikia 2.700 metro karratukoa da.

Azkenik, Zentral Elektrikoa Sociedad Española de Construcción Naval erakundeak La Naval eratu zuenean altxatu zuen gutxi gorabehera 1916. urtean. Zehatz-mehatz esanda, garai hartako zerbitzu-eraikinik zaharrena da kontserbazioaren ikuspegitik. Higiezinak 240 metro karratu okupatzen ditu, eta azalera eraikia 480 metro karratukoa da.

Gobernuko Planarekin lerrokatuta dagoen proiektu estrategikoa

Udal-erabakia oso-osorik sartzen da Udalak legealdi honetarako adierazitako ibilbidearen orrian. 2023-2027 aldirako Gobernu Planak bere helburuen artean du La Navalen lursail zaharrak garatzea industria berriak ezartzeko eta Sestaorako aukera ekonomikoko eremu berriak sortzeko, hiria berroneratu eta ingurumenaren ikuspegitik hobetzeaz gain.

Lizentzia hauei esker, Udalak bere borondatea berretsi du indarrez eta irmoki La Navalen susperraldi integrala bultzatzen jarraitzeko. Ez gara eraikin bereziak kontserbatzeaz bakarrik ari, eremu estrategiko bat antolatzeaz, birgaitzeaz eta aktibatzeaz ere bai, hurrengo hamarkadetan garapen ekonomikoari, jarduera erakartzeari eta Sestao proiektatzeari begira.

Gorka Álvarez Sestaoko alkateak azpimarratu du “La Naval pieza nagusia dela Sestaoko etorkizunean. Hiru lizentzia hauek direla bide, oso urrats garrantzitsua egingo da, balio handiko industria-ondarea berreskuratzen jarraituko baita eta, aldi berean, eraldaketa-prozesua finkatuko baita jarduera, aukerak eta bultzada berria sortzeko udalerrian”.

Álvarezek gaineratu du “eraikin enblematikoen, babestuen eta historiaz kutsatutakoen gaineko jarduerez hitz egiten ari garela, baina etorkizunaren aldeko apustuaz ere bai. Sestaon oso argi dugu gure industria-oroimena babestea eta gure eremu estrategikoak aktibatzea ez direla helburu bateraezinak, hiri-anbizio beraren bi aldeak baizik”.

Pasa den abenduan Udalak beste obra-lizentzia bat eman zuen bi eraikin babestu birgaitzeko La Naval eremuan. Kasu horretan, Tailer Mekanikoa eta Makinen eta Galdaren Tailerra ziren. Bi jarduera horiek 6 milioi euroko inbertsioa eskatzen dute, eta berriki hasi dira gauzatzen.