Sestaoko Udalak Tokiko Gobernu Batzordean onetsi ditu baldintza-agiriak lizitazioan jartzeko Galindoko futbol-zelaietan dagoen edaritegia. Helburua da zerbitzua abiaraztea eta erabiltzaileen esperientzia hobetzea kirol-instalazioetan.

Jarduketa honi esker, Udalak beste urrats bat egin du udalerriko kirol-ekipamenduak etengabe hobetzearen aldeko apustuan. Hala, zerbitzu osagarriak eman nahi ditu dinamizatzeko eta klubek, familiek eta, orokorrean, jendeak erosoago eta modu osatuagoan erabiltzeko.

Kontratu berriak edaritegiaren ustiapena arautuko du prozedura irekiaren bidez, eta lehia publikoa bermatuko da, neurri egokiak hartzeaz gain zerbitzua kalitatezkoa eta instalazioen eta erabiltzaileen egungo beharretara egokitua izateko.

Lizitatzeko gutxieneko ezaugarriak

Udalak taberna-zerbitzuaren ustiapena 10 urterako jarriko du lizitazioan. Agirietan, Udalak abiapuntuko alokairutzat 3.000 euro definitu ditu urtean, baina lizitatzaileek zenbatekoa hobetu ahalko dute puntu gehiago eskuratzeko. Sestao Kirolak erakundeak ordainduko ditu argia eta ura.

Horrez gain, Udalak ezarri du denboraldian edaritegia gutxienez 17:00etatik 21:30era irekita egongo dela astelehenetik ostiralera bitartean, 08:30etik 21:00etara larunbatetan eta 08:30etik 15:00etara igande eta jaiegunetan. Denboraldiaurrean, astelehenetik ostiralera egongo da irekita 18:00etatik 20:30era, eta asteburuetan partidak daudenean. Uztailean, abuztuko lehenengo astean, abenduaren 24, 25 eta 31n eta urtarrilaren 1 eta 6an instalazioak itxita egongo dira. Irekitzeko ordutegi horiek ere hobetu ahalko dituzte lizitatzaileek lizitazio-prozesuan puntu gehiago lortzeko.

Halaber, izangaiek aurkezten duten negozio-plana aztertuko du Udalak, eta hobekuntza gisa baloratuko du puntu gehiago lortzeko euskararen erabilera. Batetik, kontratuaren barruan, adjudikaziodunaren giza baliabideak baloratuko dira, zerbitzuaren hartzaileek une oro euskaraz arreta jaso, informatu eta komunikatu ahal izateko. Gainera, egiaztatuko da gutxienez langileen B1 titulua aurkeztuz, kartel-elebidunen adibideak eginez eta sustapen-kanpaina elebidunen ereduak jorratuz.

Espazioaren ezaugarriak

Edaritegiak 8,75 metro karratuko sukaldea du, 9,73 metro karratuko barra, eta kanpoaldean eremu bat ageri da terraza jartzeko.

Sestaoko alkate den Gorka Álvarezek azaldu du “urrats irmoak jarraitzen ditugula egiten gure kirol-instalazioak eta haietan eskaintzen ditugun zerbitzuak hobetzeko. Helburua ez da mantentzea bakarrik, bai eta aktibatzea, erabilgarri bihurtzea eta biziagoak izatea ere herritarrentzat”.

Bestalde, Borja Ramón Kirol eta Hezkuntza zinegotziak azpimarratu du “taberna abian jarriko dela Galindoko zelaiak egunero erabiltzen dituztenen egiazko eskeari erantzuteko.

Lizitazio honen helburua da zerbitzu egonkorra eta kalitatezkoa bermatzea eta Sestaoko oinarrizko kirolaren eta kirol-jardueraren inguruan giro hobea sortzen laguntzea”. Lizitazioa hurrengo egunetan argitaratuko da Udaleko Kontratatzailearen Profilean, eta, modu horretan, prozesua irekiko da pertsona edo enpresa interesdunek proposamenak aurkezteko onetsitako agirietan zehazten diren baldintzen arabera.

Ekimen honekin Udalak kirolaren aldeko bere konpromisoa berresten du gizarte-kohesioko ardatz gisa eta udalerriko bizi-kalitatea hobetzeko.