Camino Txikitoko Egikaritze Unitatearen Hitzarmen Batzordeak batzar orokorra egin du gaur goizean, eta bertan erabaki giltzarriak hartzen hasi dira udalerrian luzaroan espero den hirigintza-proiektu honen garapenean aurrera egiteko.

Udalak, etxebizitzak sustatzen dituzten enpresek eta jabe partikularrek parte hartzen duten kudeaketa-organoa da Hitzarmen Batzorde hau.

Gaur egindako bileran, Batzordeak proiektua idazteko eta obra zuzentzeko lizitazio publikoaren prozesua hastea onartu du, kontrataziorako baldintza-agiriak barne.

Lizitazioaren oinarrizko aurrekontua 645.910 eurokoa da (BEZik gabe), eta prozedura hainbat irizpideren araberako lizitazio irekiaren bidez izapidetzen da, proposamenen kalitate teknikoari, plangintzaren ezagutzari eta talde profesionalaren kaudimenari lehentasuna emanez, eskaintza ekonomikoaz gain.

Eremuak konplexutasun tekniko berezia dauka, topografiagatik, hiri-ingurune finkatuarekiko integrazioagatik, trenbide-azpiegituren presentziagatik eta ingurumenbaldintzatzaileengatik, eta horrek kalitate eta zorroztasun goreneko proiektu bat eskatzen du.

Urbanizazio-proiektua urteko azken hiruhilekorako prest egongo da

Proiektua idazteko aurreikusitako epea 23 astekoa da, kontratua formalizatzen denetik zenbatzen hasita.

Bileraren amaieran Gorka Álvarez alkateak adierazi duenez, "gaur urrats erabakigarria eman dugu. Camino Txikito plangintzako aurreikuspen izateari utzi eta errealitate ukigarri bihurtzen hasi zen. Hiri-eraldaketa zorroztasun teknikoarekin eta ibilbide-orri argi batekin aktibatzen dugu".

Akordio horren bidez, oso urrats garrantzitsua egin da urbanizazio-obrak datozen hilabeteetan hasi ahal izateko eta hirigintza-garapen hori abian jartzeko bidean aurrera egiteko.

Camino Txikito Sestaoko erdialdearen eta Txabarri auzoaren arteko arrakala josteko proiektu estrategikoa da. Auzo berri honetan etxebizitzak, garaje-partzelak, herritarrentzako espazio publikoak eta merkataritza-lokal berriak eraikitzea aurreikusten da. Urbanizazio-proiektuak irisgarritasuna hobetzeko konponbideak jasoko ditu, gaur egun eremuaren goiko eta beheko aldeen arteko desnibel handiak baldintzatuta.

Azken batean, hiri-kirurgiako operazio bat da, udalerria eraldatzeko eta modernizatzeko prozesuan aurrera egitea ahalbidetuko duena, eta, gainera, Sestaoko erronka nagusietako batzuei erantzuten lagunduko duena, hala nola etxebizitzarako sarbideari, irisgarritasuna hobetzeari eta aparkalekurik ezari.​​