Sestaoko Udalak obra bat adjudikatu du Kueto herri-ikastetxeko kanpoko jolastokia birgaitzeko. Jarduketa ikasleen segurtasuna hobetzeko eta eremu horretan ikusi diren egiturazko arazoak ebazteko da.

Jolastokiak 1.334 metro karratu ditu, eta 1972. urtean eraiki zen ikastetxearekin batera. Gainera, eremu hori udal-jabetzako aparkalekuaren estalkia da, eta ur-filtrazioak izan dira gainazala narriatuta dagoelako eta zoladurak euriteekin irrist egin duelako.

Kontratua Barik Reformas 2019 SL enpresari adjudikatu zaio 285.523,63 euroren truke. Lanak otsailaren amaieran hasiko dira eta egikaritze-epea hamaika astekoa da.

Obra, Eraikinen Mantentze-lan eta Espazio Publikoen zinegotziak azaldu duenez, “esku-hartzea halabeharrezkoa eta lehentasunezkoa da, zoladura egoera txarrean baitago, eta arazoak sortzen baititu ikasleek egunero jolastokia erabiltzeko orduan, bai eta gainazal horren azpian dagoen udal-aparkalekuan ere”.

Zinegotziak azpimarratu du “obra honekin eskola-jolastokiaren segurtasuna eta baldintzak hobetzeaz gain, behin-betiko konponbidea emango diegu beheko eraikinak jasaten dituen ur-filtrazioei”.

Lanen barruan dago lehengo zoladura guztia eraistea garajeari dagokion forjatuaren goiko aldea agerian utzi arte. Agerian dagoenean, beharrezkoa izanez gero, egiturazko elementuen armadura oxidatuak konponduko dira.

Era berean, perimetroko harrizko erradapia zulatu eta eraitsiko da. Sarbide nagusian, eskaileraren lehen maila altxatuko da beheko aldea iragazgaizteko eta ondoren maila berreraikitzeko. Eskaileren bigarren tartean, lehenengo hiru mailetan jardungo da, iragazgaizpen- eta berreraikuntza-prozedura berari eutsiz.

Jarduketak amaitzen direnean, jolastokia oso-osorik zolatuko da, hustubide berriak sortuko dira euri-urak behar bezala ebakuatzeko, zorrotenekin konektatzen diren ukondoak aldatuko dira eta, azkenik, jolastokiko lineak margotuko dira.

​“Lanean jarraitzen dugu Sestaoko espazio publikoak eta hezkuntza-eremuak modernizatu eta egoera onean mantentzeko, azpiegitura seguruak, iraunkorrak eta egungo beharretara egokitutakoak bermatuz”, esan du azkenekoz zinegotziak.​