Sestaoko Udalak lehentasunezko arreta-beharra duten kolektiboei zuzendutako Enplegu Plan berri bat jarriko du martxan. Horri esker langabezian dauden 24 pertsona kontratatuko dira “Hiri Antolamendua eta Eraikin Publikoen Mantentzea” izeneko enplegu eta prestakuntza programaren edizio berri baten bidez.

Programa honen helburu bikoitza da, alde batetik, lan-merkatura sartzeko zailtasun handiagoak dituzten pertsonen enplegagarritasuna hobetzea eta, beste aldetik, udalerriko ingurune urbanoaren eta udal eraikinen hobekuntzan laguntzea.

Zehazki, 24 kontratazio egingo dira, honela banatuta:

• 12 lehen mailako ofizial igeltserotza eta/edo margolaritzako ofizioetan.
• 12 igeltserotza eta margolaritzako peoi espezialista.

Enplegu zinegotziak, Carlos García de Andoin, nabarmendu du plan hau “ez da aukera laborala soilik, baizik eta lan-merkatura sartzeko zailtasun handienak dituzten pertsonentzat benetako inklusio- eta lan-duintasun tresna bat”. Ildo horretan, gehitu du “enplegua eta prestakuntza uztartzen dituzten programei egiten diegula apustu, epe ertainean eta luzean emaitzarik onenak ematen dituztelako”.

Bi fase: prestakuntza eta kontratazioa

Programak bi faseetan garatuko da.

Lehen fasea 110 orduko talde-prestakuntza izango da, parte-hartzaileei beren ezagutza teknikoak eskuratzeko, sendotzeko eta eguneratzeko aukera emango diena, lanera sartu aurretik.

Bigarren fasea sei hilabeteko kontratazio epea izango da, lanaldia %75ekoa izanik. Aldi berean, 60 orduko zeharkako gaitasunen prestakuntza eta orientazio laboral indibidualizatua jasoko dute, lan-merkatuan ondorengo txertaketa errazteko.

Aldi honetan, kontratatutako pertsonek hiriaren itxuratze-lanetan eta eraikin publikoen mantentze-lanetan parte hartuko dute aktiboki, espazio publikoa eta udal zerbitzuak hobetzen lagunduz.

García de Andoin-en arabera, “Hiri Antolamenduaren programak aukera ematen digu Sestao hobetzeko, eta aldi berean benetako enplegu-aukerak sortzeko, bereziki gehien behar dutenentzat”. Nabarmendu du, halaber, “plan hauetan inbertitzen den euro bakoitzak itzulera sozial oso garrantzitsua duela udalerriarentzat”.

Enplegu Plan honetarako egindako inbertsioa 714.385,78 eurokoa da guztira; horietatik 410.760 euro Lanbidek jarriko ditu, eta gainerako 303.625,78 euroak udalak bere kontura.

Izena emateko epea

Enplegu Plan honetan parte hartu nahi duten pertsonek urtarrilaren 19tik 25era bitartean eman ahal izango dute izena, Lanbideren webgunearen bidez.

“Epea laburra da; horregatik, baldintzak betetzen dituzten pertsona guztiei animatzen diegu ahalik eta azkarren izena ematera eta aukera hau ez galtzera”, gogorarazi du zinegotziak.