Sestaoko Udalak asteartean egin du ekaineko ohiko osoko bilkura eta bertan hartutako erabakirik azpimarragarriena 2025eko aurrekonturako lau kreditu-aldaketa izapidetzea izan da. Aldaketa horietan hainbat partida ekonomiko sartu dira, udalerria hobetzeko eta Gobernu Plana betetzeko lanean jarraitzeko.

Lehenik eta behin, Kuetoko Ikastetxe Publikoko kanpoko patioa berritzeko aurrekontua handitu da, obra kontratatzeko lehen ahaleginak huts egin ondoren. Jarduera hori oso beharrezkoa da jolas-eremua egoera onean uzteko, bai eta azpian dagoen aparkalekura ur-iragazketarik ez gertatzeko ere. 74.000 euro gehiago gehitu ondoren, prest daude obra berriz ere kontratatzen saiatzeko behar diren 275.000 euroak.

Gainera, 13.000 euroko beste partida bat sortu da 40 Open Basque Country Sestao xake txapelketa egiteko. Sestao Xake Klubak antolatu duen nazioarteko txapelketa hori Las Llanas Udal Pilotalekuan jokatuko da.

Bestalde, 17.000 euroko partida bat sortu da etxebizitzaren egoerari buruzko diagnostiko-txosten bat kontratatzeko, Sestao Eremu Tentsionatu izendatzeko Eusko Jaurlaritzari egindako eskaera izapidetzeko urratsak ematen jarraitzeko.

Halaber, 4.000 euroko partida bat jarri da 45 mahai tolesgarri erosteko. Mahai horiek Kultura Sailaren esku egongo dira, udalerrian antolatzen diren ekitaldietan erabiltzeko. Kreditu-aldaketekin jarraituz, Bizkaiko Foru Aldundiaren 50.000 euroko dirulaguntza bat gehitu da aurrekontuan, Bizipark bizikletentzako aparkaleku bat egiteko. Hori da lizitaziora ateratzeko dagoen jarduketetako bat.

Azpimarratzekoa da Udalak 21.500 euro gehitu dizkiola Udalekuko kontratuari, plaza kopurua handitzeko. Udalak hil honen hasieran jakinarazi zuenez, uda honetan 100 plaza eskaini dira txanda bakoitzean. Hala ere, jasotako eskaeren kopurua dela eta, kupoa handitu egin da lehenengo bi txandetan 140 plaza izateko.

Azkenik, zenbateko garrantzitsuena, 4.026.000 eurokoa, Ikastunen Eskolako estalkia eta fatxadak energia aldetik birgaitzeko izango da. 4 milioi euro horiek Espainiako Gobernuak eman dituen 3 milioi euroko dirulaguntzaren eta Udalak proiektu horri ekiteko egingo duen 1.026.000 euroko ekarpenaren batura dira.

​Behin dirua kontsignatuta, datozen egunetan kudeaketa-enkargu bat egingo zaio Sestao Berri sozietateari obra horien kontrataziorako. Lanak urteko azken hiruhilekoan hastea aurreikusten da.