Sestaoko udalbatzak, maiatzeko ohiko bilkuran, luzapena onartu du Txabarri-El Sol eremuan babes publikoko etxebizitzak sustatzeko eta hiri-berrikuntzarako Eusko Jaurlaritzak, Udalak eta Sestao Berri sozietateak sinatutako lankidetza-hitzarmenarentzat.​

Duela lau urte, 2021eko ekainaren 3an, sinatutako akordio horrek Txabarri-El Sol berroneratzeko azken konpromisoak biltzen zituen. Zehazki, dokumentuak 127 etxebizitza publiko eraikitzea aurreikusten zuen, baita zenbait hiri-espazio berritzea ere, auzoko bizilagunentzako elkarguneak eta sozializazio-eremuak sortzeko helburuarekin.​

Gorka Alvarez alkatearen hitzetan: "Lau urte hauetan asko aurreratu dugun arren, beharrezkoa da hitzarmena beste lau urtez luzatzea, une honetan martxan ditugun jarduera guztiak burutzeko, eta bi hamarkadako birsorkuntza lanari amaiera emateko".​

Hitzarmenaren indarraldiko lau urte hauetan hainbat proiektu gauzatu dira, hala nola Vicente Díez parke berria, Martxoaren 8ko Plaza berria eta etxebizitza publikoko bi sustapen, lehenengoa 15 etxebizitzakoa (Nicolás Ormaechea kalea, 6). eta bigarrena 9 etxebizitzakoa (Txabarri kalea, 67).​

Aldi berean, erakundeek aurreratu egin dituzte akordioan jasota zeuden eta datozen hilabeteetan protagonista izango diren beste konpromiso batzuen hirigintza-izapideak. Adibidez, ekainean hasiko dira Los Baños kaleko 49 eta 51 zenbakietan eraikiko diren 21 etxebizitzen obrak.​

2026. urtearen hasieran, Txabarri kaleko 33, 39 eta 43 zenbakietan 28 etxebizitza eta kale bereko 57 eta 59 zenbakietan beste 20 etxebizitza eraikitzeko lanak martxan jartzea ere aurreikusi da. Bi kasuetan, eraikuntzaproiektua kontratatu da eta hirigintza-kudeaketa amaitzen ari da, eta horrek zenbait eraispen egitea ekarriko du.​

Hitzarmenean jasotako beste proiektu bat Txabarri kaleko 47. eta 49. zenbakietan 34 etxebizitza eraikitzea da. Jarduketa hori ez dago aurrekoak bezain aurreratuta, eta, gaur egun, Eusko Jaurlaritza gomendioa izapidetzen ari da Sestao Berri sozietateak obra horiek kudeatu ditzan.​

Txabarri kaleko 69. zenbakian dagoen eraikinaren birgaitze integralari dagokionez, aurreproiektua egin da, eta laster kontratatuko dira egikaritzeproiektua eta ordezko sustapen-hitzarmena jabeen erkidegoarekin. Akordioak urbanizazio arloko beste bi proiektu aurreikusten ditu.​

Lehenengoa Karrantza kaleko orubeari dagokio. Kasu honetan, urbanizazioproiektua kontratatu da, baina jarduketa Eusko Jaurlaritzak Udalari lursaila uzteko zain dago, obrak egin ahal izateko. Kudeaketa hori egin ondoren, lanen lizitazioari ekingo zaio.​

​Txabarri kaleko 57-61 zenbakien atzealdeei dagokienez, urbanizazio-proiektua kontratatu da, baina urbanizazio-obrak lizitatu ahal izateko titulartasun publikoa lortzeke dago. Udalak espero du gai hori laster konpontzea, obrak gauzatu ahal izateko.​