Sestaoko Udalak aste honetan hasi ditu Las Llanaseko Udal Pilotalekuaren fatxadetan isolamendu termikoa eta eguzki-panelak jartzeko lanak. Lanek 1,7 milioi euroko kostu ekonomikoa dute, eta kirol-esparru hori birgaitzeko proiektuaren hirugarren eta azken faseari dagozkio. Dena ondo badoa, aurtengo azken hiruhilekoan amaitzea aurreikusi da.

2019 eta 2020 urteen artean lehen faseari eta 2022 eta 2023 urteen artean bigarren faseari ekin ondoren, Udalak Las Llanaseko Udal Pilotalekua birgaitzeko proiektua amaitzear du, abian jarri den hirugarren fase batekin.

Lau fatxadetan SATE sistema bat instalatuko da, frontoiaren isolamendu termikoa hobetzeko. Ekialdeko eta hegoaldeko hormak panel fotovoltaikoz estaliko dira, eraikina autohornitzeko energia garbia ekoizteko. Gainera, aldageletako eta tabernako ur beroko termoen ordez aerotermiako termo berriak jarriko dira. Proiektu honi guztiari amaiera emateko, ibilgailu elektrikoak kargatzeko bi puntu jarriko dira Amezaga zinema zaharraren aparkalekuan.

"Frontoian egingo dugun azken jarduketa horri esker, eraikinak C motako kalifikazio energetikoa izatetik A motako kalifikazio energetikoa izatera igaroko da", nabarmendu du Alfonso Tapia Eraikin eta Espazio Publikoen Obra eta Mantentze zinegotziak, eta gaineratu du Gobernu Taldearen ekintza gidatzen duten plan estrategiko batzuek babesten dituztela horrelako jarduketak, hala nola Sestaoko Hiri Agendak.

Gorka Álvarez alkateak, bestalde, Udalak hiru fasetan ekipamendu hori birmoldatzeko inbertitu dituen hiru milioi euroei esker, "urte honen amaieran frontoi irisgarriagoa, erosoagoa, seguruagoa eta eraginkorragoa izango dugu. Azken finean, XXI. mendeko frontoia ".

Obra horren kostu ekonomikoa ordaintzeko, Sestaoko Udalak 2.030.283,10 euroko dirulaguntza jaso du NEXT GENERATION funts europarretatik, 2. eta 3. faseen artean banatu dena.