Gorka Álvarez Martínez Sestaoko alkate izendatu dute gaur. Azken udal-hauteskundeetako EAJ-PNVren hautagai-zerrendako 2.ak, orain arte udal-taldearen bozeramaile gisa jardun duenak, Ainhoa Basaberengadik jaso du "makila"; azken horrek kargua utzi baitu Udalean 14 urte eman ostean, azken laurak alkate gisa.

Álvarezek 36 urte ditu, eta gaztea bada ere, esperientzia handia du udal-kudeaketan. Zinegotzia da 2015etik, eta legebiltzarkidea Gasteizen 2017tik. Izan ere, ostegun honetan egin du bere azken agerraldia bertan, udalerriko alkatetzan esklusiboki jarduteko.

Kargua hartu ondoren egin dituen lehen hitzetan adierazi du “erronka berri honi aurre egiten diola ilusioz, harrotasunez, eta konpromiso pertsonal batekin: bihotzarekin eta buruarekin lan egitea Sestaori bultzada berria emateko", udalerri horretan bizi izan baita bizitza osoan.

Alkate berria alderdi politikoekiko elkarrizketara eta akordiora ohituta dago, eta, horregatik, eredu hori nortasun-ikur bihurtu nahi du. Inbestidura-hitzaldian azpimarratu duenez, gobernatzea "ez da inposatzea, arduraz entzutea, hitz egitea eta erabakitzea baizik ". Horregatik, hain zuzen ere, "oposizioko taldeei, elkarteei eta herritar guztiei" eskaintza egin die udalerria batera eraikitzen jarraitzeko.

Bere hitzaldian udalerriko eguneroko arazoei erantzuna ematearen garrantzia azpimarratu du, baina baita epe luzerako proiektu bat eraikitzearen garrantzia ere, Sestaok etorkizunean norantz jo nahi duen jakiteko. Proiektu zehatzik aipatu ez badu ere, adierazi du berroneratzea "gure helburu nagusietako bat izango dela, betiere gure nortasuna eta gure memoria historikoa errespetatuz".

"Aukerak dituen Sestao nahi dugu. Bere jendea zaintzen duen Sestao. Inor atzean utziko ez duena. Eta, horretarako, udal honek ateak zabalik izango ditu.

Erakunde hurbila izango da. Auzotarren zerbitzura dagoen Udala", gehitu du Udalburuak.

Gorka Álvarezek, egun garrantzitsu honetan, familiaren eta lagunen babesa jaso du, eta eskerrak eman dizkie "hurbiltasunagatik, laguntzagatik, indarragatik eta ilusioagatik". Bere alderdiko kargu organikoek ere lagundu diote, eta eskerrak eman dizkie erantzukizun hori bere gain jartzeko izan duten "konfiantzagatik". Hitzaldia amaitzeko, gobernu-kide duen PSE-EEri zuzendu zaio; eta bere botoekin Alkate izatea ahalbidetu dion partiduari bere babesa eskertu eta "orain arte lan egiteko moduan aldaketak egiteko eta lankidetzarako borondatea" ere adierazi dio.