Sestaoko Udalak duela gutxi berritu ditu Sestao River Clubekin, San Pedro Kirol Elkartearekin eta Antonio Trueba Boleibol Klubarekin dituen lankidetza-hitzarmenak.

Akordio horiek hiru oinarri edo helburu nagusitan oinarritzen dira: lehenik eta behin, udalerrian oinarrizko kirola sustatzea; bigarrenik, emakumeen kirolari bultzada ematen jarraitzea, neskek eta mutilek kirola egiteko aukera berdinak izan ditzaten; eta, hirugarrenik, Sestaoren irudia sustatzea.

Hala, hitzarmen horien arabera, Sestaoko Udalak dirulaguntza zuzen baten bidez lagunduko du hiru klub horien jarduera. Hala, Sestao Riverrek 40.000 euro jasoko ditu denboraldi honetan, San Pedro Kirol Elkarteak 25.000 euro eta Antonio Trueba Boleibol Klubak 20.000 euro.

Aliantza hori denboraldiz denboraldi berritu daiteke 2027. urtera arte, kopuru berberekin, betiere senior taldeak gaur egun lehiatzen diren kategoria beretan mantentzen badira. Senior taldeek gora edo behera egingo balute, zenbatekoak gorantz edo beherantz egokituko lirateke.

Taldeek, bestalde, eskola-kirolaren eta Federazioaren jarraibideei jarraiki entrenamenduak egiteko konpromisoa hartu dute, haurren garapena sustatzeko.

Era berean, kirola sustatzeko txapelketak, jarduerak eta prestakuntzak garatzeko konpromisoa hartu dute, garapen fisikoan, emozionalean eta mentalean parte hartzen duten pertsonei hazkuntza-etapa guztietan laguntzeko.

Aldi berean, hiru klubek aukera-berdintasunaren alde lan egingo dute, batez ere emakumeari eta etorkinei dagokienez, enplegua bere gain hartuz eta Udalak onartutako hizkuntza-irizpideak errespetatuz eta elebitasuna sustatzen saiatuz.

Hitzarmen berri hauen aurkezpenean, Ainhoa Basabe alkatea eta Jesus Amenedo Kirol zinegotzia, Angel Castro Sestao Riverreko presidentea, Eliseo Molinuevo San Pedro Kirol Elkarteko presidentea eta Cesar Ruiz Antonio Trueba Boleibol Klubeko presidentea izan dira.

Osoko Bilkuren Aretoan egindako prentsaurrekoan, Basabek hiru akordio horiek berritzeko arrazoiak eman ditu: "Udalak badaki Sestao Riverrek, San Pedo Kirol Elkarteak eta Antonio Trueba Boleibol Klubak duten oinarrizko kirolaren eta emakumeen kirolaren egitura hain garrantzitsua mantentzeak kostu handia duela, eta, horregatik, gure nahia da haiekin lankidetzan aritzea, Sestaoko haurrek kirola modu planifikatuan eta ondo muntatutako eta ordenatutako egitura baten barruan egiteko aukera izan dezaten".

Jesús Amenedok, bere aldetik, adierazi duenez, dirulaguntza honek "hiru talde hauek egiten duten kirol-prestakuntzako eta haurren prestakuntza pertsonaleko gizarte-lan hain garrantzitsua aintzatesten du".