Sestaoko Udalak Las Llanas udal pilotalekuaren birmoldaketa-lanak burutuko dituen hirugarren faseari ekingo dio. Azken jarduketa horrek kirol-instalazioaren kanpoaldea izango du ardatz, eta egingo diren ekintzen artean, nabarmentzekoak dira fatxadetan isolamendu termikoa eta panel fotovoltaikoak instalatzea, eraikinaren energia eraginkortasuna hobetzeko. Obrak egiteko kontratua BYCAM enpresari esleitu zaio 1.744.185 eurotan.

Hurrenez hurren, 2019-2020 eta 2022-2023 urteen artean egindako lehen eta bigarren faseak amaituta, Udalak Las Llanas udal-pilotalekua birgaitzeko proiektua amaitzear du 2025. urtean, dagoeneko abian jarri den hirugarren fasearekin.

Galindoko futbol-zelaien ereduari helduz, lehiaketa irabazi duen enpresa arduratuko da, lehenik eta behin, exekuzio-proiektua idazteaz. Horretarako, zortzi asteko epea izango du, eta, ondoren, 26 asteko iraupena izango duten aurreikusitako obrei ekingo die. Formula horrek denbora aurrezteko aukera ematen du, lizitazio-prozesu bi batera egiteko aukera ematen baitu.

Alfonso Tapiak, Obra eta Eraikin eta Espazio Publikoen Mantentze Lanetako zinegotziak, prentsaurrekoan azaldu duenez, "1. eta 2. faseak batez ere frontoiaren barnealdea hobetzean oinarritu ziren, 3. fase honetan, ordea, jarduketak eraikinaren kanpoaldeari eragingo dio". Horrela, isolamendu termikoa jarriko da frontoiaren fatxadetan eta estalkian. Ekialdeko eta hegoaldeko fatxadak ere panel fotovoltaikoekin estaliko dira, baita Las Llanas futbol-zelaiko lehentasuneko harmailaren estalkia ere, energia elektrikoa sortzeko. Proiektuak, gainera, ur bero sanitarioa aerotermia bidez ekoizteko sistema bat instalatzea aurreikusten du, eta, amaitzeko, ibilgailu elektrikoak kargatzeko bi puntu instalatuko dira Amezaga zinema zaharreko aparkalekuan.

"Ekintza-multzo horri esker, Las Llanas Udal Pilotalekua eraikin jasangarriagoa izango da eta ingurumena errespetatuko du", adierazi du zinegotziak, eta zera gaineratu du: "eraikina C motako kalifikazio energetikoa izatetik A motako kalifikazio energetikoa izatera igaroko da, erdira murriztuko baitira bai energia kontsumoa bai atmosferara isuritako karbono dioxidoa".

Hasiera batean, ez dago aurreikusita 3. fase honek Las Llanas udal pilotalekuko kirol-jardueran aldaketak eragitea, obrek eragin ohi dituzten eragozpenetatik harago. Obra horren kostu ekonomikoa ordaintzeko, Sestaoko Udalak 2. eta 3. faseetan banatu den 2.030.283,10 euroko dirulaguntza lortu du Europako NEXT GENERATION funtsetatik.

Ainhoa Basabe alkateak gogorarazi du hirugarren fase hori amaitzean Udalak "hiru milioi euro baino gehiago" inbertituak izango dituela 1968an inauguratu zen kirol-esparrua modernizatzeko. “Kopuru horrek, Galindoko futbol-zelaien berrikuntzan berriki inbertitu diren 3,9 milioi euroez gain, agerian uzten du gobernu-taldea ahalegin handia egiten ari dela Udalaren kirol-instalazioak eguneratzeko. Datozen urteetan inbertsio-ahalegin horri eutsi nahi diogu, eraberritu beharra duten beste kirol-instalazio batzuk ere hobetzeko".