Sestaoko Udalak proiektu bat agindu berri du Kueto auzoko Arturo Kanpion kalearen etorkizuneko birmoldaketa planifikatzeko.

Arturo Kanpion kalea desnibel handiagatik eta eskailera luzeengatik nabarmentzen da. Eskailera horiek oztopo arkitektoniko garrantzitsua dira bizilagunentzat. Iaz, gainera, arazo bat sortu zen saneamendu-sarean; arazo horri irtenbide bat eman zaio Bilbao Bizkaia Ur Partzuergoarekin, baina behar bezala zuzendu behar da.

Beraz, Udalak Arturo Kanpion kalean egingo duen obrak irisgarritasuna hobetzea eta lurpean dauden zerbitzuak berritzea izan behar du helburu.

Udalak aurreproiektu bat kontratatu zuen aurreko legealdian, kale horretan zer irtenbide mekaniko egokitu zitekeen hobeto aztertzeko, udalerriko Irisgarritasun Planaren barruan ez baita lehentasunezko ibilbidetzat hartzen. Desnibela ikusita eta atariei eta lonjei zerbitzua emateko zenbat geldialdi egokitu behar diren ikusita, egokiena eskailera mekanikoak jartzea zela erabaki zen.

Arkitektura-estudio irabazleak zortzi asteko epea du obra-proiektua idazteko, eta, beraz, uda amaieran entregatzea espero du Udalak.