Sestaoko Udalak, Behargintzak eta Sestao Berri sozietate publikoak SestaON FIRE kultur ekitaldia antolatu dute azaroaren 10erako, ostirala, Labe Garaiari omenaldia egiteko. Izan ere, monumentu hori asmo handiko birgaitze-proiektu batean murgilduta dago, sortzen ari den Sestao berriaren bultzatzaile izan dadin. Proiektua Bizkaiko Foru Aldundiak sustatu du, Bizkaiko Lurralde Historikoan erakarpen turistikoko ekitaldiak egiteko dirulaguntzen programaren bidez.

2023an Europa zeharkatzen ERIH (European Route of Industrial Heritage) datorren astean Bilbora iritsiko da, eta Erakundeak Bizkaiko hiriburuari egingo dion bisita izan da ospakizunaren eragilea. Izan ere, ekitaldi horen helburuetako bat Sestaoko Labe Garaiaren interes turistiko eta ondarezkoa europar batzordeari erakustea da, Industria Ondarearen Europako Ibilbidean geraleku estrategiko gisa sartzea onar dezan.

Artea eta kultura Labe Garaiaren berotasunean

Ekitaldiari emandako izena, SestaON FIRE, ez da kasualitatea izan, Sestaok Ezkerraldean izan duen garrantzia berreskuratzeko erakundeak eta herritarrak egiten ari diren lan osoaren laburpena baita. Udalerrian "zerbait garrantzitsua" gertatzen ari dela eta eragile guztiak ahalik eta energia handienarekin elkarlanean ari direla adierazi nahi du.

Labe Garaia eraberritze sakon batean murgilduta dago gaur egun, bisitatzeko gune bihurtzeko asmoz. Ezkerraldeko monumenturik garaiena izango da, eta herrian egingo den industria-turismoaren protagonista. Sentimendu hori babesteko, ospakizunerako egin den komunikazioak iraganaren berotasuna aipatzen du etorkizuneko motor gisa: “Gure udalerria berotzen ari da. Gogor entzuten da. Gero eta erritmo biziagoan. Bere izaera industriala argitsu dago berriro. Ezkerralde osoa beti argitu duen argi horrekin. Labe Garaiari, Sestao berriaren itsasargi den horri, egingo diogun omenaldira gonbidatzen zaitugu. Zatoz eta bat egin jaiarekin!”

Jaiak hainbat jarduera izango ditu, ekitaldi instituzional batek bi fasetan banatuko dituenak. Jarduera horiek kalitate artistikoagatik aukeratu dira, Sestaoko udalerriak proiektatu nahi duen ondare-balioa kontuan hartuta.

17:30ean batukada bat egingo da Kasko plazatik Hiru Kontzejuen plazaraino; ondoren, Troula Animación taldearen su-kalejiraren txanda izango da, Hiru Kontzejuen plazatik Labe Garaiko aparkalekuraino.

Harrera instituzionala ERIHko ordezkaritzari

17:30ean, bere aldetik, Udalak, Ainhoa Basabe alkatea buru duela, 60 lagunek osatzen duten ERIH (European Route of Industrial Heritage) batzordearen nazioarteko ordezkaritza bat hartuko du, Labe Garaia Industria Ondarearen Europako Ibilbidean sar dadila puntu estrategikoa gisa formalki eskatzeko.

Eguneko unerik gorena 19:30ean hasiko da, ElektrARTek egingo duen Labe Garaiaren argiztapen artistikoko ikuskizunarekin; eta, ondoren, 20:00etan, Parabellum bandaren doako kontzertua egingo da Labe Garaiko aparkalekuan. Kontzertu honek berezitasun bat izango du: Gris Perlaren kantuak izango ditu, Sestaoko talde historiko honetako gitarra-jolea Parabellumen parte baita egun.