Salleko Saskibaloi Klubak irailaren 15etik 17ra bitartean antolatuko duen gizonezkoen Nazioarteko Finetwork-Salleko U14 Txapelketaren lehen edizioak estatuko saskibaloiaren harrobi onenak elkartuko ditu gure herrian.

Asier Muñoz Torneoaren zuzendariak gaur Udaletxean egin den aurkezpen ekitaldian azaldu duenez, "txapelketa hau antolatzeko ideia izan genuenean, hasiera batean, Salleko saskibaloi klubaren 50. urteurrena ospatzeko ekitaldi nagusia izatea nahi genuen soilik, baina herrialde osoko saskibaloi taldeentzako torneoen egutegietan hurrengo urteetarako erreferente ere bihur daitekeela uste dugu; horregatik, oso ekitaldi zaindua eta ACBko harrobiko taldeen ordezkaritza gorenarekin egin nahi izan dugu".

Finetwork enpresa babesle nagusi gisa duen lehiaketa honetan parte hartuko duten 12 taldeen artean estatuko saskibaloiaren klub handiak daude, hala nola, Real Madrid, Valencia Basket, Baskonia, Bilbao Basket, Estudiantes, Gran Canaria eta San Pablo Burgos. Horiekin guztiekin batera, Next Hoops akademiak, EASO Basketek, Colindresek, Atletico San Sebastianek eta Salleko taldeak osatuko dute titulua lortzeko hautagaien hirukoa.

Parte hartu duten 12 taldeak hiruko lau taldetan banatu dira. Multzo bakoitzeko lehen biak final-laurdenak jokatzeko sailkatuko dira, eta partida horiek erabakiko dituzte finalerdietara eta, ondoren, final handira pasatzen diren taldeak. Partidak Portugaleteko Pando eta Sestaoko La Benedicta Kiroldegietan
jokatuko dira; baina inaugurazio partida, finalerdiak eta finala Sestaoko kirol- instalazioetarako erreserbatuko dira.

Sestaoko Udalak, Bizkaiko Foru Aldundiarekin batera txapelketaren antolaketari diruz lagundu dionak, barkamena eskatu nahi izan dio Salleko klubari, hasiera batean, partida garrantzitsuenak Las Llanas kiroldegian jokatzea aurreikusita zegoelako. Hala ere, bertara ura sartu izanak kantxaren zati bat altxatzea eragin du, eta gorabehera hori txapelketa honetarako konpontzerik izan ez denez, partidetako batzuk aldameneko Portugaletera eraman behar izan dira.

Kiroletako zinegotzi Jesús Amenedok espero du gertaera horrek ez duela ilunduko Sestaoko saskibaloiarentzat historikoa izango den asteburua: "Udalak eskerrak eman nahi dizkio Salleko taldeari txapelketa hau antolatzeko eta kirol honen etorkizuneko izarrekin gozatzeko aukera izan dezagun egin duen ahalegin handiagatik. Auzokide guztiak partidetara hurbiltzera animatzen ditugu, ziur baikaude ikuskizun polita ikusiko dugula".

Asteburuan zehar jarduera interesgarriak izango dira, hala nola, finalerdietako partiden eta finalaren emanaldiak Youtubeko Basket Cantera TV kanalean. Real Madrileko speakerra txapelketan izango da. Txapelketan kontsumituko den ur-markak, AUARAk, planetako alde behartsuetan ur-putzuak egiteko proiektu solidarioak babesten ditu.