Ostiralean eman genion hasiera hauteskunde-kanpainari, Txiki Eguna ospatuz San Pedro Plazan. Haurrei zuzendutako jaia izan zen, eta haurrek hegalari eta maskara tailerrak eginez gozatu ahal izan zuten, disko-festan dantzatuz edo bertaratutakoen artean banatzen ditugun baloiekin jolastuz. Giro oneko eta dibertimenduzko arratsaldea izan zen, eta hautagaitzaren zati handi bat bertan izan zen, Sestao bizitzaz betetako herria dela berriro erakutsiz.

Ainhoa Basabe egungo alkate eta berrautaketarako hautagaiak aukera aprobetxatu zuen EAJ-PNVk maiatzaren 28ko udal hauteskundeetara aurkeztuko duen hauteskunde programaren zertzelada batzuk emateko. Zerrendaburuak konpromisoa hartu zuen Sestao auzotarrek lanerako, etxebizitzarako eta aisialdirako aukerak izango dituzten herria izan dadin lan egiteko.

Enpleguaren arloan, Ainhoa Basabek adierazi zuen EAJ-PNVk lanean jarraituko duela udalerrian enpresa gehiago ezar daitezen bultzatzeko. Ildo horretan, hurrengo legegintzaldirako erronka nagusietako bat La Navalen lurrak suspertzea izango da, industria-enpresez betetzeko. EAJ-PNVren Gobernu-Taldea egungo jabeekin, VGP enpresa belgikarrarekin, lanean ari da, 2025ean urbanizazio-obrak hasteko helburuarekin.

Enplegua sortuko duen beste proiektu garrantzitsu bat adinekoentzako Egoitza berria eta Bizkaiko Foru Aldundiak Sestaon eraikiko duen eskualdeko zentro soziosanitarioa izango dira. Ibarzaharra industrialdean Eusko Jaurlaritzarekin Osasun Polo bat eraikiko dugu, gure udalerria erreferente bilakatuko duena hainbat arlotan, hala nola gailu medikoen eta osasun-produktuen diseinuan, garapenean eta fabrikazioan.

Etxebizitzaren arloan, gazteak Sestaon bizitzen gera daitezen lan egiteko konpromisoa hartzen dugu, baita beste herri batzuetara joan ziren bizilagunek itzultzeko aukera izan dezaten ere. Aurrera eramango ditugun proiektu nagusiak La Puntan babes publikoko 180 etxebizitza eraikitzea eta Txikito Bidearen proiektua hastea izango dira. Proiektu horretan 230 etxebizitza berri eta 350 garaje-partzela eraikitzea aurreikusten da.

Aisialdiari dagokionez, Ainhoa Basabek asmo handiko kultura- eta aisialdi-programazioa garatzearen aldeko apustua egin du, Udalak berak antolatutako jarduerak eta udalerriko elkarteen jarduerak uztartuz. Horregatik, elkarte-sareari gure laguntza osoa emateko konpromisoa hartzen dugu, bere kultura-programak gauzatu ahal izan ditzan.