Sestaoko EAJ-PNVk atzo aurkeztu zuen maiatzaren 28ko udal hauteskundeetara aurkeztuko duen hautagaitza. Ainhoa Basabe egungo alkatea izango da zerrendaburua.

Ekitaldia San Pedro Plazan egin zen, hamarnaka herritar, afiliatu eta jarraitzaileren aurrean, alderdiarentzat hain garrantzitsua izan zen arratsalde batean. Aurkezpenean parte hartu zutenen artean aipatzekoak dira Itxaso Atutxa Bizkai Buru Batzarreko presidentea eta Josu Bergara Enkarterriko barrutiko Bizkaiko Batzar Nagusietarako zerrendaburua.

Ainhoa Basabek "esperientzia eta gaztetasuna nahasten dituen hautagaitza" aurkeztu zuen, "erronka guztiak bere gain hartzeko prest, ilusio handiz eta kudeatzeko gaitasun handiarekin". Plantxako lehen postuetan udal-kudeaketan eskarmentu handia duten pertsonak daude, baita pertsona gazteak ere, eta horiek freskotasuna, dinamismoa eta ideia berriak emango dizkiote hautagaitzari.

Bere hitzaldian, egungo alkate eta hautagaiak esan zuen "EAJ-PNV udal hauteskundeak irabaztera ateratzen dela" eta horretarako bost konpromiso hartu zituen herritarren aurrean.

Lehen konpromisoa pertsonak udal-politiken erdigunean jartzea da: "Enplegua izango da gure lehentasuna, eta zahartze aktiboko politikei ere garrantzi handia emango diegu. Era berean, atal honen barruan, gure gazteei lan eta etxebizitza aukerak eskaintzeko lan egingo dugu".

Basabek hartu zuen bigarren konpromisoa "inbertsioen programa orekatu bat abian jartzea izan zen, Sestaoko auzo guztiek aldi berean aurrera egin dezaten, irisgarritasuna hobetzeari arreta berezia jarriz".

Hirugarrenik, gure udalerriko erronka nagusiei erantzuten saiatuko diren proiektu estrategikoak gauzatzeko lan egiteko konpromisoa hartu zuen. Proiektu eraldatzaile horiek honako hauek izango dira: La Navaleko lurren hirigintza-garapena, udalerrian industria berriak ezartzea bultzatzeko; Rebonza auzoan adinekoentzako egoitza bat eta unitate soziosanitario bat eraikitzea, ehun bat lanpostu sortuko dituena; Ibarzaharra enpresa-parkean polo biosanitario bat eraikitzea; Sestaoko eta Areetako geltokiak itsasadarraren azpitik komunikatuko dituen tren anezka bat eraikitzea; eta, azkenik, Txikito Bidean etxebizitzak eraikitzeko proiektuaren obrak hastea.

Laugarren konpromisoa herritarrekin aktiboki entzuteko prozesuak garatzen jarraitzea da, baita Udalaren gainetik dauden administrazio publiko guztiekin harreman ona izatea ere, Sestaora inbertsioak erakartzen jarraitzeko helburuarekin.

Amaitzeko, Sestaoko EAJ-PNVren hautagaitzak aurkeztu zuen bosgarren konpromisoa proiektuarekiko konpromiso pertsonala izan zen. "Gure alderdiaren ezaugarri den zerbait badago, gure lanerako gaitasuna da. Inplikatzen garen proiektuarekin dugun konpromiso pertsonala. Horregatik, hautagaitza hau osatzen dugun guztiok %100ean inplikatuko gara herri honek aurrera egiten jarrai dezan eta gure bizilagunen bizi-kalitatea hobetzeko. Nire kasuan, alkatea izango naiz 24 orduz egunean, 7 egunez astean, 365 egunez urtean, orain arte egin dudan bezala", adierazi zuen Ainhoa Basabek.

ZERRENDA:

1. Ainhoa Basabe
2. Gorka Álvarez
3. Yosune Serapio
4. Jesús Amenedo
5. David Sánchez Maroto
6. Flori Núñez
7. Borja Ramón
8. Josefina San Miguel
9. Alex Moneo
10. Aitziber Aristizabal
11. Jon López
12. Gorka Egia
13. Igor de Pablos
14. Patricia de la Torre
15. Amaia Lazpita
16. Javi Lerena
17. Sergio Corral
18. Itziar Torrealdai
19. Ander San José
20. Idoia Aréjula
21. Alberto Lozano “Martxi”
22. Izaskun Etxebarria
23. Aitor Pérez
24. Ganixtebe Lerma