Sestaoko Udalak astearteko osoko bilkuran onartu du Sestao Bai Enpresa Parkean bi pabiloi eraikitzea ahalbidetuko duen xehetasun-azterlana. Eraikin horiek gune horretan enpresa berriak ezartzeko bide emango dute.

Hirigintza-jarduketa hori egingo den lursailen jabe den enpresak aurkeztu du xehetasun-azterketa. Horren arabera, Hiri Antolamenduko Plan Orokorrean definitutako lau partzelak bi lurzatitara murriztuko dira; horietako batek hirigintza-aprobetxamendu osoa izango du; eta besteak, berriz, ez, bertan goi-tentsioko dorre bat baitago.

Horrela, 10.608 metro koadroko azaleraren gainean, lehenengo partzelak 10.465 metro koadro hartuko ditu eta 10.897 metro koadroko eraikigarritasun-eskubidea izango du; goi-tentsioko dorrea instalatuta dagoen zatiak, aldiz, 143 metro koadro izango ditu eta bertan ezin izango da ezer eraiki.

Xehetasun-azterketa horri esker, nabeen eta haien lerrokaduren orientazioa ere aldatu ahal izango da.

Xehetasun-azterketa izapidetu eta onartzearekin batera, enpresak bi pabiloien eraikuntza-proiektua aurkeztu du Hirigintza arloan, dagokion obra-lizentzia lortzeko. Udaleko zerbitzu teknikoak dokumentazio hori aztertzen ari dira eta, behar bezala dagoela egiaztatuta, espero da obra-lizentzia hori otsailean sinatuta egotea.

Sestaoko alkate Ainhoa Basabek positibotzat jo du proiektu hori, enpresa berriak udalerrira iristea bultzatuko baitu: "Gobernu taldeak lanean jarraitzen du enpresa eta proiektu berriak erakartzeko gure enpresa-parkeetara, tokiko ekonomia suspertzen lagundu eta langabeei lan-aukerak eskaintzeko helburuarekin".