Sestaoko Udalak ebatzi berri du eraikinen egitura birgaitzeko edo irisgarritasuna hobetzeko obrak egin dituzten Jabe Komunitateentzako dirulaguntzen deialdi publikoa. Aurtengo deialdian, Hirigintza Sailak erabaki egin du 84 komunitateri guztira 170.341 euroko diru-laguntzak ematea.

Egitura birgaitzeko obra komunitarioak - Fatxadak eta teilatuak - egiteko diru-laguntzen kasuan, 47 eskabide onartu dira, eta horietatik 24 justifikatuta daude eta datozen egunetan hasiko dira ordaintzen. Gainerako 23 komunitateek, berriz, onartutako laguntza jaso ahal izateko, urtarrilaren 31 baino lehen justifikatu beharko dute obrak amaitu direla. Programa horretara 82.341 euro bideratzea aurreikusi da.

Irisgarritasuna hobetzeko obra komunitarioak egiteko diru-laguntzen kasuan - Igogailua jartzea, arrapala jartzea, igogailua 0 kotara jaistea -, 37 eskabide onartu dira, eta horietatik 14 justifikatuta daude eta datozen egunetan hasiko dira ordaintzen; gainerako 23 erkidegoek, berriz, urtarrilaren 31 baino lehen justifikatu behar dute obrak amaitu direla, onartuta duten laguntza jasotzeko. Programa horretara 88.000 euro bideratzea aurreikusi da.

Programa horien bidez, Udalak aitortu egin nahi du jabeen komunitateek ahalegin handia egiten dutela higiezinak hobetzeko eta udalerria modernizatzen laguntzeko.