Maiatzeko ohiko osoko bilkura asteartean, maiatzaren 25ean, egin da, eta Gobernu Taldeak udal-aurrekontuari egindako azkeneko bi kreditu-aldaketen berri eman du.

Kreditu-aldaketak udal-aurrekontuan hasieran onetsitako kredituen zenbatekoak, helburua edo denbora aldatzeko erabiltzen dira.

Azpimarragarriena da udal-aurrekontuari milioi bat euro baino gehiago sartu zaizkiola diruzaintzako gerakinetik inbertsio berriak finantzatzeko.

“Milioi euro hau gaitu dugu gure udalerria hobetzen jarraitzeko eta, kasu honetan, ahalegin handia egingo dugu udal-eraikinetan, sail desberdinek helarazi dizkiguten beharrei erantzuteko”, azaldu du Ainhoa Basabe alkateak.

Diruzaintzako gerakinetik datorren diru honekin hurrengo jarduketa hauek bultzatuko dira:

• Kaiku etorbideko horma konpondu eta egonkortzea: 650.000 euro.
• Las Llanas kiroldegian galdara ordezkatzea: 152.810 euro.
• Kuetoko zentro sozialeko eskailerak egokitzea: 128.000 euro.
• Las Llanas futbol-zelaian komunak eta prentsa-gunea berritzea: 72.650 euro
• Udaltzaingoaren polizia-etxean emakumeen aldagelak hobetzea: 68.100 euro.

Jarduera hauek guztiak pixkana jarriko dira abian hurrengo asteetan zehar.