Sestaoko Udalak auto judiziala betearazi du gaur goizean (Bilboko Administrazioarekiko Auzietako 2 zenbakiko Epaitegiaren 24/2025 zenbakia), Txirbilenea elkarteak egun okupatzen duen Ikastunen Eskola zaharraren eraikina husteko baimena emateko.

Ertzaintzarekin, Udaltzaingoarekin eta udal-zerbitzuekin koordinatuta, jarduera lasaitasunez egin da 9: 00etatik aurrera, barruan ez baitago jenderik. Helburua da instalazioak erabiltzen dituzten pertsonen segurtasuna zaintzea, higiezinaren kontserbazio-egoera txarrak dakarren egoera larriaren aurrean.

Ildo horretan, gogorarazi behar da udal-zerbitzu teknikoek txosten bat egin zutela Ikastunen Eskolak dituen gabeziez ohartarazteko, eta "guztiz bateraezina" dela eskola barruko edozein jarduerarekin. Auzitegiek behin baino gehiagotan berretsi dute egoera hori prozesu judizial osoan.

Auto judiziala irmoa da, eta haren aurka ezin da errekurtsorik jarri. Martxoaren 18an eman zuten, eta hilabeteko epea eman zioten udalari, bertan sartzeko eta bertan egon zitezkeen okupatzaileak handik ateratzeko. Gaur egin dute jarduketa hori, eta, ondoren, sarbideak estali dituzte.

Instalazioen egungo kontserbazio-egoerak dakarren arrisku larriaz gain, Udalak higiezin hori berreskuratu behar du, 2022ko abendutik baita haren jabe, estalkiaren eta fatxaden birgaitze energetikorako proiektu bat ahalik eta lasterren bultzatzeko, xede horretarako lortutako 3 milioi euroko Europako dirulaguntza galtzeko arriskua baitago.

Obra horiek hutsik dagoen eraikinarekin egin behar dira, eta proiektuak bizkortzeko aukera emango dute, higiezin horrek etorkizuneko sustapen ekonomikoaren motor gisa izango duen zeregina suspertzeko, enpleguaren eta erabilera kulturalaren alde.

Gizarte Ekintza Sailak laguntza eskaini zien Ikastunen Eskolaren barruan bizi ziren familiek urtarrilaren 30ean jakinarazi zuten eskola utzi zutela eta beste bizitoki batzuetan kokatu zirela.

Utzarazpen hori gorabehera, Gobernu Taldeak mezu bat helarazi nahi du, udalerriko elkarteekiko errespetu instituzionala, erantzukizuna eta konpromisoa adierazteko. Ildo horretan, Udala elkarrizketa-proposamen bat lantzen ari da Txirbileneako Batzarrari eta Emakume Migratu Feministak elkarteari zuzenduta, lokal bat lagatzeko bere jarduerak garatzeko eta Ikastun Eskolan dituzten materialak eta ekipamenduak gordetzeko.