Udalak lanean dihardu oraindik Sestaoko herritarren artean bosgarren edukiontziaren erabilera orokortzeko. Helburua etxeko hondakinen bereizte- eta birziklatze-ratioak hobetzea da.

Xede horrez, Udalak hurrengo astean San Pedro plazan karpa bat ipiniko du zerbitzuaren inguruko zalantzak argitzeko, alta berriak kudeatzeko eta dagoeneko erabiltzaile diren familiei poltsa konpostagarrien sorta berria doan entregatzeko.

Informazio-puntua astelehenetik (otsailak 15) larunbatera (otsailak 20) egongo da, goizez 10:00etatik 13:00etara eta arratsaldez 16:00etatik 19:00etara.

Otsailean Udalak eta bide-garbiketa nahiz zabor-bilketaren zerbitzua kudeatzen duen enpresak (UTE RSU Sestao) udalerri guztian bosgarren edukiontzia ipini zutenetik urtebete igaro da.

Lehenengo ekitaldi honetan pandemiaren erruaz abian jartzeko arazoak izan dira, baina udalerrian bosgarren edukiontziaren partaidetza-kuota ondorengo hau da:

Sestaon 13.232 etxebizitza daude eta % 32k (4.243 etxebizitza) du txartela gai organikoa edukiontzi marroira botatzeko; bien bitartean, gainerako % 68 (8.989 etxebizitza) oraindik ez zaio sistemari atxiki.

Txartela eta birziklatzeko elementuak dituzten 4.243 etxebizitzetatik, % 30ak (2.351) behar bezala parte hartu eta ohiz birziklatzen du, % 15ak (626) gutxi parte hartzen du eta noizean behin dihardu birziklatzen. Azkenik, etxebizitzen % 55ak (1.266) ez du edukiontzi marroia erabili, nahiz eta elementuak nahiz txartela jaso dituen.

Gaur egun, astean batez beste 4 tona hondakin organiko biltzen ari dira.

Hirigintza, Etxebizitza, Industria, Zerbitzu eta Ingurumen Zinegotzigoko arduradun gorenak, Ainhoa Basabek, gogorarazi du birziklatzeak duen garrantzia eta gure inguruneari horrek dakarzkion onurak, horregatik, herritarrak gonbidatu nahi ditu ahaleginak indartzera.

“Gai organikoa birziklatuz gero, klimaren aldaketaren aurkako borrokan lagunduko dugu, baliabide baliotsuak aurreztuko ditugu eta gure lurzoruak aberasteko konposta lortuko dugu, gai organikoaren zikloa ixteaz gain, berotegi efektuko gas gutxiago igorriko dira, eta europar zuzentarauek adierazitako birziklatze-helburuetara iritsiko gara”, azaldu du zinegotziak.

Edozein arrazoi dela eta, jendeak hurrengo astean San Pedro plazara ezin badu hurbildu, Udalak gogorarazi nahi du izapide berak egin daitezkeela Bide Garbiketaren Zerbitzuko Herritarren Arreta Bulegoan, Doctor Ferrán kaleko 12. zenbakian.