Sestaoko Udaleko Udaltzaingoaren Bitartekaritza Unitateak 104 esku-hartze eskabide izan ditu zerbitzuaren lehen urte honetan, eta gaur arte 74 kasu itxi ditu eta gainerako 30 kasuak zabalik jarraitzen dute, jarduera honen txostenak jasotzen duenaren arabera.

Udaltzaingoaren Bitartekaritza Unitatea 2013ko ekainean jarri zen abian bere helburua udalerriko elkarbizitza hondatzen duten auzoen arteko arazoetan era proaktiboan esku hartzeko. Horrela bada, hiru udaltzainek osatutako taldea eratu zen hiritarren artean sortzen diren liskarrei konponbidea ematen saiatzen dena. Erabiltzen den metodologiak alde bien arteko borondate ona eta erabakiak hartzeko askatasuna ditu oinarri, hau da, arazoaren parte diren alde biek onartzen badute bakarrik ekingo zaio bitartekaritza lanari. Bitartekaritza erabiliz, alde biek sinatuko duten akordioa bilatu nahi da eta hori beteko delako konpromisoa hartu, horrela kasuak epai-bidean sartzea saihestuz.

Lehen urte honetan egindako 107 esku hartze eskabideetatik 47 zaratek eragindakoak izan dira, 20 desakordioengatik, beste 20 usain txarra eta zikinkeriagatik, 7 animaliek eragindako molestiengatik, beste 7 alokairua ez ordaintzeagatik, 6 obra eta hezetasunek eragindakoak eta 5 adingabeek eragindako arazoengatik.

104 eskabide horietatik, 74 itxita daude, udaltzainek horien jarraipena egiten ari diren arren, eta gainerako 30 kasuak irekita daude.

Udalak Udaltzaingoaren Bitartekaritza Unitatea egiten ari den lanaren inguruko balorazio oso positiboa egin du. Josu Bergara alkateak uste du talde honek "auzokoen komunitate batzuetan urte luzez konpondu gabe eta bizikidetzari eragiten zioten arazoei irtenbidea ematen lagundu du”, hori dela eta alkatearen iritziz “udaltzaingoaren bitartekaritza lana egiten jarraitu behar dugu oso tresna eraginkorra izan baita udalerriko zenbait zonaldetan dagoen tentsioa arintzeko”.