Gaur asteazkena hasi eta datorren igandera arte, La Benedicta kaian Bilboko Portua eta Itsasadarra Fundazioaren "Port Art” erakusketa ibiltaria egongo da, Sestaoko Udala horren parte delarik.

Erakusketa honen helburua gizarteari Bilboko Portuaren historia, jarduna eta garrantzi ekonomikoa jakitera ematea da, eta baita ibaiertzeko udalerriekin izan duen harremana. Informazio hau emateko 20 oineko (6 metro) sei edukiontzi jarri dira eta hauen dekorazioa 50. hamarkadaren bukaerako pop art mugimendu artistikoan inspiratzen da.

Lehen edukiontziaren helburua, Roy Lichtenstein-en obran girotua, Bilboko Portuaren gaineko informazio orokorra eskaintzea da. Bigarrenak, Jasper Johns artistaren obraren eragina du, Portuak Ibaiaren ertzean dauden udalerriekin historian zehar izan duen harremana aztertzen du. Hirugarrenak, Frank Stella artista ekartzen digu gogora, Portuak munduarekin izan duen lotura erakusten du. Laugarrenak, Andy Warhol artistaren omenezkoak, Portuaren ingurumen politika du ardatz. Bosgarrenak, James Rosenquist artistaren lanetan inspiratua, merkantzia-kontsignazko, estibatze eta itsasoko garraio zerbitzuak erakusten ditu eta seigarrenak, Jackson Pollock estilokoak, portuetan hara hona dabiltzan merkantziak ditu erakusgai.

Sestaori dagokionean, bigarren edukiontziak Portuaren eta udalaren arteko harremanaren informazioa ematen du. Harreman hori oso lotua egon da La Benedictaren garapenarekin, Portuko Agintaritzak utzi baitzizkion gaur egun kiroldegia dagoen lurra, berak egin baititu kai-muturreko lanak eta berak hartu baitu parte uda garaian kaian egiten diren jolas eta kirol jardueretan.

Erakusketaren ordutegia honako hau izango da: astegunetan, 11:30etik 13:30era eta 17:00etatik 20:00etara eta larunbat eta igandetan 12:00etatik 14:00etara eta 17:00etatik 20:00etara. Udalak dei egiten die herritarrei hara hurbildu eta erakusketa ezagutzera.