SESTAO

Prentsa Aretoa

2025/01/15

Ostiral Kulturalak programak 34 antzerki eta musika ikuskizun programatu ditu 2025erako

Ramón Barea, Andoni Aguirregomezcorta eta Jon Plazaola aktore ospetsuak, besteak beste, arituko dira Musika Eskolan

rss Ezagutzera eman
Ostiral Kulturalak programak 34 antzerki eta musika ikuskizun programatu ditu 2025erako

ARGAZKIA JAITSI

Carlos García de Andoin kultura zinegotziak gaur aurkeztu duen 2025eko Ostiral Kulturalen programazioak, guztira, 34 antzerki eta musika ikuskizun eskainiko ditu herriko Musika Eskolan urtarrila eta abendua bitartean.

Azken urteotan bezala, ostiral arratsaldeetako kultur programazioa bost bloke handitan banatuko da. Horrela, Ostiral Kulturalen ibilbidearen lehen atalak antzerki amateurra eta emakumeek egindako antzerkia eskainiko du, eta bigarren zatian, aldiz, antzerki profesionalak protagonismo osoa hartuko du.

Udako etenaldiaren ondoren, Ostiral Kulturalak berriz ere hasiko dira irailaren amaieran, umorezko antzerkiaren hilabetearekin, eta, horren ostean, musikaren hilabetea eskainiko dute amaitzeko. Kultura-eskaintza garrantzitsu hori amaitzeko, Gabonetan gazteenek haur eta gazteentzako lau antzerki-lan izango dituzte aukeran beren aisialdiaz gozatzeko.

Aurten Musika Eskolako ekitaldi-aretoan jardungo duten aktore ospetsuenen artean, Ramón Barea, Andoni Aguirregomezcorta eta Jon Plazaola arte eszenikoetako profesionalak nabarmendu behar dira.

Musikaren atalean, berriz, aipamen berezia merezi dute Bilboko Orkestra Sinfonikoaren Harpa Boskotearen kontzertuak, bai eta Camerata Lírica taldeak eskainiko duen operak ere.

"Udalak proposamen ugari dituen programa bat aurkeztu du, gure bizilagunak asteburuetan kulturaz gozatzen has daitezen animatzeko. Musika Eskolara hurbiltzen direnek ezustez betetako programazio bat aurkituko dute, hainbat gai uztartuko dituena, besteak beste, barre-algarak, antzerkira egokitutako literatur klasikoak, mezu sozial bat duten lanak, bakarrizketak... Azken batean, kultura sestaoar guztiei helarazteko eskaintza zabal bat", adierazi du Carlos García de Andoinek.

Iaz lez, hala nahi dutenek emanaldietarako sarrerak Euskal Ocio interneteko webgunearen bidez erosi ahal izango dituzte. Teknologia berriak erabiltzera ohituta ez dauden pertsonek, aldiz, sarrerak leihatilan erosten jarraitu ahal izango dute emanaldiak hasi baino ordubete lehenagotik.

Sarreren prezioa azken urteotakoa izango da, hau da, 6 eta 8 euro artekoa, obren kalitatearen arabera.​